أ ر ز ا ق
ربنا سبحانه وتعالى ادى كل واحد حقه
ادى واحد المال وحرمه من العيال
وادى واحد العيال وحرمه من المال الابقدر ما يستطيع ان يجعلهم يأكلون ماهو ربنا ما بيخلقش حد وينساه
وساعات بقه يدى حد المال والعيال ويحرمه من انهم يبقوا كويسين يطلعوا عيال جزم ولاد كلب
المهم انه فى الآخر هما أربعه وعشرين قيراط كل واحد بياخدهم ،عدد ثابت من السينات انت بتدخل الدنيا وهما معاك بما فيهم العيل الغبى أوالعاق والبت الصايعه وطبعا ده نقص وربنا يكمله فى حته تانيه
مثلا الواحد يكون عنده الصحه انه يقعد يهاتى ويزعق طول النهار من غير ما يطب ساكت او يجى للبعيد سكته قلبيه وبرضه يبقى ده رزق جاره
اللى مستحمل صوت هذا البقف بقاله سنين
حتى جاره لو حاول انه يتخلص منه ويسكن فى حته محترمه و خلاص بقه الواد عدى ودفع القرشين اللى حوشهم بعد سفره وغربته سنين او بعد ميراث طلع عين اهله من المشاكل مع اخواته لحد ما خده
وسكن بقى فى حته حلوه …يطلعلك بواب يبصلك من فوق لتحت وانت نازل ووانت طالع,ولو ريحت دماغك منه وهرشت الفوله وبدات تصرف عليه هو وعياله
يطلعلك فى العماره اللى قصادك عيل قاعد طول النهار فى البلكونه بلبوص متابع حركتك وحركه اللى الشقه ومش عارف تتصرف ازاى وفجأه يتفتق ذهن الزوجه
ايه رايك نعمل تنده المونيوم عشان المصيبه اللى قدامنا ، ده طبعا لو الواد مش داخل دماغ البنت .
رزق برضه حد لاقى عرسان اليومين دول
المهم تدفع وتعمل التنده ، ظبطت الدنيا واستريحت
يطلعلك التكييف بتاع جارك بايظ ومش عارف تنام من الزن … يعنى رزق من الآخر مش ممكن تهرب منه
الحياه مسأله صعبه ومجهولاتها كثيره
والقيم مجهولة القيمه لأنها تقبع فى صدور الناس وضمائرهم عايشينها من غير ما نحاول نحلها
بنراقب المقدمات والتوالى لكن النتايج بتاعت ربنا
وحتى لا تصبح كلماتي دعوه للاستسلام
اعمل الخير وادعو اليه
عيش الحياه بوجهك الشريف
وتعامل مع الوجوه الشريفة